අහෝ දෙවියනි කලේ වරදක් මවා ලොව වනසන්න මිනිසා……

ඔන්න ටික දවසකට පස්සේ සමනලීට ආයෙත් ඔයාලගේ හිත් අද්දරින් පියාසලන්න හිතුනා…

මේ දවස් ටිකේ හරිම කම්මැලි කමකින් ගෙවුනේ. වැඩ තියෙද්දී කරගන්න බැරි තරම් පෝළිමට එක පිට එක එනවා…. ඒත් වැඩ නැතිකොට හිතෙනවා අනේ වැඩ තිබුනානම් කියලා…. ඒ ඉතින් මිනිස් සිතේ හැටියක්නේ, කවදාවත් තියෙන දෙයින් සෑහීමට පත්නොවීම….

විශේෂ වැඩකුත් නැති නිසා සටහන් ගොන්න ලංකරගත්තා.. අනේ ඒක කියවන්නත් කම්මැලියි වාගේ. කොහොමත් සමනලීට ඕවා හරියට කියවෙන්නේ විභාගේ ලඟටම ඇවිත් අත වැනුවාම තමයි ඉතින් 😀

මේ දවස් වල ඉර මාමත් හරිම සැරයි නෙව!!! සමනලීට එලීයට පහලියට බැහැලා පොඩ්ඩක් නිදහසේ පියඹන්නත් බෑ ඒ සැරට…. ඒත් පොඩ්ඩක් කන් තියාන හිටියාම සමනලීට ඇහුණා වටපිටාවේ ගස් වැල් ‍බොහොම තරහෙන් කථා කරනවා…

“අපි කවදාවත් මේ පොළොවට කිසිම නරකක් කලේ නෑ… මේ මිනිස්සු කියන ජාතිය කරන්න පුලුවන් හැම විනාශයක්ම කරලා පරිසරය නාස්ති කලා… දැන් ඉතින් අපිටත් එයාලා නිසා දුක් විදින්න වෙලා….”

බලන් ගියාම එයාලා කියන්නේ ඇත්ත තමයි…

තව ටිකක් හොදට කන් දීගෙන ඉන්නකොට සමනලීට ඇහුණා දුම පිරුණු අහසේ පියාඹමින් ඉන්න පුංචි කුරුල්ලන්, කිලුටු උන වතුර ගලායන දොලේ පීනාගෙන යන චූටි මාළු රංචුව.. මේ සේරම ගස් වැල් එක්කලා එක්කාසු වෙලා මනුසතාට විතරක් නෙවී ලෝකේ මවාපු දෙවියන්ටත් නොසෑහෙන්න බනිනවා……..

සැමට එක ලෙස සතුට විදිනට පොළෝතල මත දිවිගෙවන්නට

ලොව මැවු දෙවි පෑවෙ දස්කම් මවා නෙක විධ ජීව සිත්තම්

එකා සැමටත් සැම එකාටත් බැදී සුරැකෙන සේ මැවු ලොව

මනා ලෙස සැම කොටස් නිමවා තැබු මුත් දෙවියන් තෙදින් සොද

වඩා හොද ලෙස මවා මනුසත් බුද්ධි බල අන් සැවොම පරදා

අහෝ දෙවියනි කලේ වරදක් මවා ලොව වනසන්න මිනිසා……

ඉර මාමත් තව තවත් සැර වෙවී අහසේ මුදුනට ආවා…. හැමෝටම සතුටින් දිවි ගෙවන්න කියලා අපූරුවට මවාපු ලෝකෙක කොයිතරම් ලැබුනත් පිරෙන්නේ නැති හිතකුයි අනිත් සතුන් හැමෝටම වඩා හොද නුවණකුයි එක්ක මනුසතාව මවන්න දෙවියන්ට හිත් පහළ උනේ ඇයි කියලා කල්පනා කර කර සමනලී හෙමින් හෙමින් ආපහු පියාඹගෙන ආවා………

කරන්න දෙයක් නැති තැන කැරකෙන ෆෑන් පෙත්ත යට වාඩි වෙලා සමනලී ඔය ගැන කල්පනා කරන්න ගත්තත් අනේ වැරදුනේ කාටද කොතැනද කියලා නම් සමනලීට කල්පනාවට ආවේ නෑ….. සමනලීගේ හිත කියවන්න ආපු යාලුවනේ…. ඔයාලට ඒ ගැන මුකුත් හිතෙනවද? එහෙනම් ඒකත් කියලාම යන්නකෝ………

Advertisement